Barcha bloglar

Ўзбекистон Бадиий академияси миллий тасвирий санъатнинг энг йирик маркази ҳисобланади. У ўз фаолияти давомида миллий тасвирий маданиятни бойитиб, истеъдодли ватандошлар камолотига ҳисса қўшди. Plov.Press билан биргаликда сизни Академиянинг тарихи ва фаолияти билан батафсил танишишга таклиф қилади.

Академиянинг ташкил этилиши

Ўзбекистон Бадиий академиясининг ташкил этилишида Ўзбекистон Республикаси Президентининг 1997 йил 23 январдаги тегишли фармони ва Вазирлар Маҳкамасининг Академия фаолиятини ташкил этиш тўғрисидаги 1997 йил 11мартдаги қарори муҳим рол ўйнади.

Академия тасвирий санъат соҳасидаги давлат сиёсатини амалга ошириш, ижодкорлар фаолиятини мувофиқлаштириш, уларнинг ҳуқуқларини ҳимоя қилиш, моддий ва маънавий қўллаб-қувватлашни таъминлаши керак эди. Академия фаолиятига ёш ижодкорларни тарбиялаш ҳам киради.

Академия таркибида тасвирий санъат йўналишида кўп босқичли миллий таълим тизими шакллантирилди. 1998 йилдан бошлаб “Санъат” журнали уч тилда – ўзбек, рус ва инглиз тилларида нашр этилади. Бундан ташқари, Ўзбекистоннинг бой бадиий меросини ўрганишга қаратилган илмий тадқиқотларнинг моддий, илмий ва услубий базаси мустаҳкамланди.

Замонавий давр

Ўзбекистон Президенти Шавкат Мирзиёев 2017йил 3 август куни ижодкор зиёлилар вакиллари билан учрашди, унда маданият, адабиёт ва санъатни ривожлантириш бўйича долзарб вазифалар белгилаб олинди.

“Ўзбекистон Бадиий академияси фаолиятини ривожлантириш ва янада такомиллаштиришга доир қўшимча чора-тадбирлар тўғрисида”ги қарор бу борада қабул қилинган муҳим ҳужжатлардан бири бўлди.

Унга кўра, Академия мамлакатда ўтказилаётган кўргазмаларнинг бадиий савиясини ошириш, санъат ва дизайн йўналишидаги таълим тизимини такомиллаштириши керак эди. Ҳужжатда жаҳонга машҳур ўзбек тасвирий ва амалий санъат мактаблари анъаналарини асраб-авайлаш ва давом эттиришга алоҳида эътибор қаратилди.

2020 йилда Ўзбекистон Бадиий академияси биноси тўлиқ таъмирланиб, бутунлай янги қиёфа касб этди. Бинода барпо этилган Академия галереясида миллий тасвирий санъатнинг ижодий ютуқлари намойиш этилиб, турли кўргазмалар мунтазам ўтказиб келинмоқда.

Бугунги кунда Академия олдига бадиий меросни асраб-авайлаш, миллий тасвирий ва амалий санъатнинг нодир дурдоналарини халқаро миқёсда тарғиб этиш, юқори малакали мутахассислар тайёрлаш, илмий-тадқиқот ишларини такомиллаштириш каби вазифалар қўйилган. Бу иқтидорли ёшларга кенг имкониятлар яратиб, халқнинг бадиий меросини келажак авлодлар учун асраб-авайлашда хизмат қилмоқда.

Академия фаолияти

Бадиий академияда ҳар йили 300 га яқин халқаро, республика, тематик, шахсий ва гуруҳ кўргазмалари ташкил этилади. Шунингдек, у хорижий дипломатик ваколатхоналар кўмагида ўтказиладиган хорижий кўргазмаларга мезбонлик қилади.

Бадиий академияда халқаро тасвирий ва амалий санъат фестивали, Тошкент халқаро амалий санъат, Тошкент халқаро замонавий санъат, “Тошкент қувончлари” халқаро болалар расмлари кўргазмалари каби қатор йирик лойиҳалар амалга оширилмоқда.

Мазкур тадбирлар хорижий давлатлар билан ижодий ҳамкорликни кенгайтиришга хизмат қилмоқда. Улар доирасида дунёнинг нуфузли илмий доиралари вакиллари иштирокида илмий-амалий анжуманлар ҳам ўтказилмоқда.

Бадиий академия турли хорижий ташкилотларбилан фаол ҳамкорлик қилади. Масалан, Хитойнинг Ханчжоу Бадиий академияси, Корея халқ тасвирий санъати уюшмаси, шунингдек, бошқа кўплаб, жумладан, турк ва ислом санъати музейлари билан ҳамкорлик меморандумлари имзоланган.

Бунинг самарасида Ўзбекистон рассомлари, санъатшунослари хориждаги кўргазма, семинар, анжуман ва симпозиумларда мунтазам иштирок этиб келмоқда.

Бундан ташқари, Ўзбекистонда Хитой, Жанубий Корея, Эрон, Туркия, Исроил, Жазоир, Миср, Туркия ва бошқа давлатларнинг дипломатик ваколатхоналари билан ҳамкорликда турли маданий тадбирлар ташкил этилмоқда.

Халқаро салоҳиятни ошириш мақсадида Корея Республикасининг Кемён университети президенти Син Иль Хи ва Озарбайжон Миллий санъат музейи директори Чингиз Фарзалиев Ўзбекистон Бадиий академиясининг фахрий хорижий аъзоси бўлди.

Келажак авлод тарбияси

Таълим ва тарбия соҳасига алоҳида эътибор қаратилмоқда. 2022 йилдан бошлаб Бадиий академияда рассомчилик устахонаси иш бошлади. Бу ерда тасвирий санъатнинг мольберт, графика, монументал рангтасвир, миниатюра, ҳайкалтарошлик каби йўналишлари бўйича таълим берилади.

2022 йилда академия ҳузурида Санъат таълими бўйича педагог ва мутахассисларни қайта тайёрлаш ва уларнинг малакасини ошириш маркази иш бошлади.

МДҲ давлатлари билан бир қаторда Хитой Халқ Республикаси, Япония, Малайзия, Таиланд, Жанубий Корея, Сингапур каби давлатларнинг таълим муассасалари билан ҳамкорликни йўлга қўйиш бўйича меморандумлар имзоланди. Бунинг шарофати билан ўзбекистонлик талабалар хорижда ўқиш имкониятига эга бўлди.

Ўзбекистон вилоятларида ҳам қизғин фаолият олиб борилмоқда. Деярли ҳар бир вилоят марказларида бадиий галереялар ташкил этилган. Уларда ҳар йили ўнлаб республика, халқаро мавзули, шахсий ва ижодий кўргазмалар ўтказилади. Бундан ташқари, ихтисослаштирилган таълим муассасалари ва мактаб-интернатлар ташкил этилмоқда, улардан бугунги кунда 16 та. Республика ихтисослаштирилган рассомлик билим юрти, Камолиддин Беҳзод номидаги Миллий рассомлик ва дизайн институти ва бошқалар шулар жумласидандир.

Фойдаланилган материаллар: art-academy.uz, уza.uz.