Ўзбекистон мактабларида нимани сотиш мумкин эмас?

Ўзбекистон таълим муассасаларида кўплаб санитария-эпидемиология талаблари, жумладан менюга ҳам мос келадиган хавфсиз ва соғлом озиқ-овқат маҳсулотлари ташкил этилган. Мактаб ошхоналарида тайёрлаш, бериш ёки сотиш тақиқланган бир қатор озиқ-овқат ва идишлар мавжуд.

Гап умумий таълим, ўрта махсус, касб-ҳунар таълими муассасалари ҳақида бормоқда. Бундай чора-тадбирлар соғлом овқатланишни ташкил этиш, юқумли ва юқумли бўлмаган касалликлар, овқатдан заҳарланишнинг олдини олишга қаратилган.

Мактабларда тақиқланган овқатларга қуйидагилар киради:

— гўшт қўшилган, майонез, кетчуп ва орасига сабзавотлар солинган нон маҳсулотлари (гамбургер, чизбургер ва хот-доглар);  

— сунъий таъм, ҳид берувчи моддалар, бўёқлар, ароматизаторлар қўшилган қандолат маҳсулотлари;  

— сунъий консервантлари бўлган «кириешки», «хрустяшки» ва чипслар, қурт, писта, донали уй шароитида тайёрланган шимиладиган ширинликлар;  

— рангли ва рангсиз газланган ичимликлар;  

— ветеринария назоратидан ўтмаган гўшт, балиқ, паррандалар; жигар, тил ва юракдан ташқари барча калла-почалар;  

— ташқи қавати тоза бўлмаган, синган, зарур талабларга жавоб бермайдиган тухумлар;  

— банкаларнинг герметиклиги бузилган, бомбажли, занглаган, шакли ўзгарган, ёрлиғи бўлмаган ва ишлаб чиқариш вақти ҳамда яроқлилик муддати белгиланмаган, айниқса, уй шароитида тайёрланган ҳар-хил турдаги консервалар;  

— турли аралашмалар ёки омбордаги зараркунандалар билан зарарланган ёрма, ун, қуритилган мевалар ва бошқа маҳсулотлар;  

— кремли қандолат маҳсулотлари (торт ва пишириқлар);  

— холодес, парранда ва туёқли ҳайвонлар оёғидан тайёрланган ҳамда калла гўшти рулетлари, ўпка-жигарли ва қондан қилинган колбасалар;  

— пастеризация қилинмаган (флягадаги) творог, термик ишлов берилмаган, идишда сақланган творог ва қаймоқ, қўлбола қатиқ, эпизоотик нохуш хўжаликлардан олинган, шунингдек дастлабки ишлов берилмаган ва пастеризация қилинмаган сут ва сут маҳсулотлари, қимиз ва таркибида этанол бўлган (0,5 фоиздан ортиқ) бошқа ачитилган сутли маҳсулотлар;  

— қўзиқоринлар ва улардан тайёрланган маҳсулотлар;  

— квас;  

— хом дудланган гўштли гастрономик маҳсулотлар ва колбасалар, шу жумладан, қайнатилган колбаса;  

— сирка, хантал, хрен (ерқалампир), аччиқ қалампир (қизил, қора) ва бошқа ўткир зираворлар;  

— ўткир таъмли соуслар, кетчуплар, майонез, консервалар, маринадланган сабзавот ва мевалар;  

— табиий кофе, тетиклантирувчи ва қувватни оширувчи энергетик ва алкоголь ичимликлар;    

— пазандалик мойлари, чўчқа ёғи, маргарин ва бошқа гидроген ёғлар;  

— данакли меваларнинг мағзи, сақич, мева ва резаворлардан тайёрланган яхна ичимликлар ва морслар (термик ишловсиз);  

– окрошка ва совуқ шўрвалар, ёғда қовурилган тухум, паштет, гўшт ва творогли қуймоқлар.  

– тез тайёрланадиган қуруқ озиқ-овқат концентратлари асосидаги биринчи ва иккинчи таомлар мактаб ошхоналарида бўлиши тақиқланади.