Ўзбекистон сиёсатшунослиги тобора халқаро эътирофга сазовор бўлмоқда. Шу жумладан Россияда ҳам

Ўзбекистонлик сиёсатшунос Шукриддин Фахриддиновнинг “Таҳдидларга чидамли жамият” концепциясига бағишланган илмий тушунчалар тўплами Россия Интеллектуал мулк федерал хизмати маълумотлар базасининг Давлат рўйхатига киритилган. Жумладан, унинг иши халқаро миқёсда тасдиқланган.

Бу тушунчанинг илмий тавсифини Ш.Фахриддинов “Тараққиётга таҳдид: назария ва амалиёт” номли монографиясида биринчи бўлиб ёритиб берди. Унда замонавий мураккаб ҳодиса ва жараёнларни назарий таҳлил қилди. Бу асар жаҳон ҳамжамиятининг эътиборини тортди ва 8 тилга таржима қилиниб, Япония, АҚШ, Германия ва бошқа мамлакатлар нашриётлари томонидан чоп этилди.

“Таҳдидларга чидамли жамият” тушунчаси ҳозирда турли илмий ҳамжамиятлар томонидан юксак эътироф этилган. Ш. Фахриддинов ўз монографиясида Ўзбекистон ва бошқа мамлакатлар тажрибаси асосида унинг қурилишини кўриб чиқди. Шунингдек, жаҳон тараққиётига таҳдид солаётган омиллар, уларнинг жамият ҳаётига салбий таъсири ва уларни бартараф этиш йўлларини белгилаб берди.

Ш. Фахриддиновнинг “таҳдидларга чидамли жамият” концептуал асари дунёда содир бўлаётган жараёнларни холисона баҳолаш ва уларни илмий сиёсий таҳлил қилиш имконини беради. У сиёсатшунослик, ижтимоий фалсафа, ижтимоий психология, социологияда қўлланилади.

Ш. Фахриддинов Ўзбекистон Миллий университетининг сиёсатшунослик бўйича ихтисослаштирилган илмий кенгаши раиси, Ўзбекистонда ва хорижда бир қатор асарлар, 300 дан ортиқ илмий нашрлар муаллифи, шунингдек, сиёсий фанлар доктори, профессор.