Асосий эътибор – ёш кадрларга

Жорий йилдан бошлаб Ўзбекистон Ички ишлар вазирлиги Академиясининг ўқув жараёнига ёш ходимлар фаолиятини мониторинг қилиш тизими жорий этилди.

Ҳар бир ҳудудга ихтисослаштирилган ва юридик бўлимлар бириктирилган ҳолда тизим жорий этилди. Бу ҳақда 21 сентябрь куни ИИВ Академияси матбуот хизмати хабар берди.

Айни пайтда профессор-ўқитувчилар томонидан таълим муассасасини битирган ёш ходимлар фаолияти таҳлил қилинмоқда. Улар амалиёт вақтидаги муаммоларни, расмий интизом масалаларини, салбий ҳолатларнинг келиб чиқиш сабабларини ўрганадилар. Натижалар асосида мавжуд муаммоларни ҳал этиш юзасидан таклиф ва тавсиялар ишлаб чиқилмоқда.

Бундан ташқари, ҳудудий бошқармаларга услубий ёрдам кўрсатиш амалиёти йўлга қўйилган.

Фуқаролик ҳуқуқи фанлари кафедраси доценти, подполковник Ойбек Холмўминов янги тизимнинг афзалликлари ҳақида тўхталиб ўтди: “Биринчи навбатда, бунинг натижасида таълимнинг амалиёт билан бевосита интеграциялашувини кучайтириш мумкин. Иккинчидан, ҳар бир ҳудуднинг хусусиятларини ҳисобга олган ҳолда илмий асосланган ёндашувлар амалиётда қўлланилади. Энг муҳими, таълим натижаларини таҳлил қилиш асосида таълим сифати ва самарадорлиги ошади”.

Ёш ходимлар фаолияти билан бир қаторда ҳудудлардаги жиноятчилик ҳолати, жиноятчиликка қарши курашиш ва ҳуқуқбузарликларнинг барвақт олдини олиш масалалари ҳам ўрганилмоқда.

Яқинда Ички ишлар вазирлиги академияси яна бир янгилик ҳақида гапирди. 2024/2025 ўқув йилидан бошлаб хорижий давлатлардан кадрлар тайёрлашни бошлайди.