Нефть ва газ университети битирувчилари Москвада магистрлик даражасини олишлари мумкин бўлади

24 октябрь куни “Ўзбекнефтгаз” раҳбари Губкин номидаги Россия давлат нефть ва газ университети ректори, профессор Виктор Мартинов билан музокаралар ўтказди. Томонлар университетнинг Тошкентдаги филиалини ривожлантириш ва Москвада магистратурада ўқиш имкониятларини муҳокама қилдилар.

Учрашувда томонлар Россия давлат нефть ва газ университети филиалида углеводородларни қайта ишлаш, ишлаб чиқариш жараёнларини автоматлаштириш каби йўналишларни очишни таклиф қилишди.

Шу билан бирга, филиал ва нефть-газ соҳасининг бошқа олий ўқув юртлари талабалари учун Москвада магистратурада ўқиш имкониятини ташкил этиш таклифи илгари сурилди.

Эслатиб ўтамиз, Россия давлат нефть ва газ университетининг Тошкент филиалида қуйидаги мутахассисликларни олишингиз мумкин:

— геологик қидирув технологияси;

— нефть ва газ бизнеси: нефть ва газ қудуқларини бурғулаш, нефть қазиб олиш объектларини ишлатиш ва уларга техник хизмат кўрсатиш, газ қазиб олиш объектларини, газ конденсати ва ер ости омборларини ишлатиш ва уларга техник хизмат кўрсатиш, нефть, газ ва қайта ишланган маҳсулотларни ташиш ва сақлаш транспортларидан фойдаланиш ва техник хизмат кўрсатиш, газ ва нефть қувурлари ҳамда газ ва нефть омборларини қуриш ва таъмирлаш;

— иқтисодиёт;

— менежмент.

Филиалга қабул қилиш ва ўқиш бўйича батафсил маълумотни олий ўқув юртининг расмий сайтидан олишингиз мумкин.