ОТМларда масофавий таълимни ташкил этишнинг хусусиятлари аниқланади

Ўзбекистон Адлия вазирлиги олий ўқув юртларида бакалавриат ва магистрларни масофавий таълим орқали тайёрлашни ташкил этиш тартибини белгиловчи низомни эълон қилди. Ҳужжат зарур техник жиҳозлар ва бошқа хусусиятларни ўз ичига олади.

Олий таълим муассасасида масофавий таълимни бошқариш учун “Таълимни бошқариш тизими” платформаси, шунингдек, интернет тармоғига уланиш инфратузилмаси бўлиши керак. Бундан ташқари, компьютер техникаси ва муҳандислик ходимлари билан жиҳозланган алоҳида аудитория лозим.

Низомда шунингдек, сервер қурилмаси ва расмий веб-саҳифа мавжуд бўлиши белгиланган. Муассаса бир йиллик таълим мазмуни, электрон ўқув-услубий материаллар, илмий ва ўқув адабиётлари базасига эга бўлиши керак.

Масофавий ўқитиш шаклига кўра, бакалавриатда 300 нафардан, магистратурада эса 30 нафардан кўп бўлмаган талаба таҳсил олиши керак. Ушбу талаб ахборот-коммуникация технологиялари йўналишларига татбиқ этилмайди. Бундан ташқари, чет эллик талабалар ҳисобга олинмайди.

Масофавий таълим талабалари LMSплатформасида рўйхатдан ўтиш учун ўқишни бошлашдан олдин университетга шахсан ташриф буюриши керак. Шунингдек, улар якуний назоратни олиш учун ҳар семестр охирида институтга келиши лозим.

Якуний давлат аттестацияси, якуний малака ва магистратура иши ҳимояси одатдаги усулда, яъни бевосита университетда ўтказилади ҳамда синхрон ёки асинхрон режимда қабул қилинишига йўл қўйилмайди.

Масофавий таълим тўлов-контракт асосида амалга оширилади. Аввалроқ Олий ва ўрта махсус таълим вазирлиги бакалавриат ва магистратура йўналишлари бўйича турли шакллар, жумладан, масофавий таълим бўйича тўловлар жадвалини эълон қилган эди.