Ўзбекистон барча аҳоли пунктларида тезликни 60 км/соатгача камайтириши мумкин

Ўзбекистон 2023 йил 1 июндан бошлаб барча аҳоли пунктларида ҳаракатланишнинг рухсат этилган максимал тезлигини 70 дан 60 км/соатгача камайтириши мумкин. Бу Президентнинг 2023йилга мўлжалланган Давлат дастури тўғрисидаги фармони лойиҳасида белгилаб қўйилган.

Ҳисоб-китобларга кўра, тезликни 10 км/соатга камайтириш ҳалок бўлганлар сонини камида 15 фоизга камайтиради. Маълумотларга кўра, 2022йилнинг ўзида биргина Тошкент шаҳрида 1200 та йўл-транспорт ҳодисаси содир бўлган, бу 2021йилга (1073) нисбатан қарийб 130 тага кўпдир. Бу даврда йўл-транспорт ҳодисалари оқибатида ҳалок бўлганлар сони 136 нафарни ташкил этади.

Муҳокама учун қўйилган лойиҳада “автомобиллар эмас, пиёдалар шаҳри” ғояси асосида йўл ҳаракати хавфсизлиги соҳасини ислоҳ қилиш кўзда тутилган. Шунингдек, у бошқа чораларни ҳам ўз ичига олади.

Тахминларга кўра, 2023 йил 1 сентябрдан бошлаб транспорт воситаси эгаси транспорт воситасини бошқариш ҳуқуқи ўтган шахс билан биргаликда тегишли ҳужжат орқали бу ҳақда Йўл ҳаракати хавфсизлиги хизматини хабардор қилиши мумкин бўлади. Хабарнома олинган пайтдан бошлаб бошқарув ҳуқуқи ўтган шахсга нисбатан ҳуқуқбузарликларни ҳисобга олиш ва маъмурий ҳуқуқбузарлик тўғрисида баённома тузиш тизимига ўзгартириш киритилади.

Яъни, автомашинани ишончнома орқали бошқараётган ҳайдовчилар автоматлаштирилган фото ва видео қайд этиш тизими ёрдамида қайд этилган қоидабузарликлар учун жарима тўлашни бошлайди. Ушбу механизмлар ҳайдовчиларга йўл ҳаракати қоидаларини бузганликлари учун жарима балларини ҳисоблаш тизимининг жорий этилиши муносабати билан тақдим этилган.

Эслатиб ўтамиз, аввалроқ Тошкент шаҳрида Кичик ҳалқа йўли ичидаги барча кўчаларда тезлик чегараси 70 дан 60 км/соатга туширилган эди. Ушбу чеклов барча вилоят марказлари ва Нукус шаҳрининг айрим кўчаларида ҳам амал қила бошлади. Урганч ва Наманганда эса бутун шаҳарда жорий қилинди.