Танзила Норбоева мамлакат Ёшлар парламенти билан учрашув ўтказди

Олий Мажлис Сенати Раиси Танзила Норбоева Ёшлар парламенти вакиллари билан учрашув ўтказди. Мамлакатнинг янги авлодини ҳар томонлама ривожлантириш бўйича истиқболли лойиҳалар ҳақида сўз юритилди.

Йиғилишда Ёшлар парламенти раиси Беҳзод Тўхтамуродов ёшларга оид таклиф ва лойиҳалар тайёрлаш бўйича ҳудудий комиссиялар фаолияти ҳақида атрофлича тўхталиб ўтди. Шунингдек, ҳудудий депутатлар фаолияти, ёшлар дуч келаётган муаммоларни ўрганиш механизмларини таъкидлади.

Ёшлар парламенти комиссиялари раислари республикада янги ташкил этилган оилавий Меҳрибонлик уйлари ҳолатини ўрганиш тўғрисида маъруза қилди. Шунингдек, ҳомийлик остидаги оила тизимини жорий этиш механизмини ишлаб чиқиш, ёш тадбиркорларга берилаётган имтиёзлар самарадорлигини ўрганиш, ёшлар томонидан содир этилаётган йўл-транспорт ҳодисалари сабабларини таҳлил қилиш ҳақида сўз юритилди.

Шунингдек, Ёшлар парламенти комиссиялари раислари томонидан жорий йилнинг иккинчи ярмига мўлжалланган лойиҳалар тақдимоти бўлиб ўтди. Давлат органларига ёшлар масалалари бўйича таклифлар киритиш учун материаллар тайёрлаш шулар жумласидандир.

Ёшлар парламентининг вазифалари

Сенат ҳузуридаги Ёшлар парламенти илк бор 2020 йилда ташкил этилган. Ёшлар манфаатларини ҳимоя қилиш, қонун ижодкорлигидаги иштирокини таъминлаш, бўлажак Сенат аъзолари ва сиёсатчиларни тайёрлаш унинг вазифаларига киради.

Ёшлар парламентида фан, маданият ва туризм, спорт, соғлом турмуш тарзи масалалари бўйича комиссиялар фаолият кўрсатмоқда. Улар компьютер технологияларидан тортиб гендер тенглиги масалалари ва стартапларгача бўлган бошқа соҳаларга ҳам таъсир қилади.

Ёшлар парламенти таркибига 18 ёшдан 30 ёшгача бўлган ташаббускор фуқаролар киради. Парламентда ҳар бир вилоятдан 6 нафар депутат, Ёшлар масалалари агентлиги тавсиясига кўра 10 нафар, шунингдек, Сенатнинг Ёшлар, маданият ва спорт масалалари қўмитаси тавсиясига кўра 6 нафардан депутат киритилади.

Шу йилнинг май ойида 1996 йилда Тошкент шаҳрида туғилган Беҳзод Тўхтамуродов мамлакатимиз Ёшлар парламенти раиси этиб тайинланган эди. Унинг номзоди кўриб чиқилди ва кўпчилик овоз билан маъқулланди. Беҳзод Ўзбекистон-Япония ёшлар инновация маркази директори ўринбосари, халқ депутатлари Тошкент шаҳар Кенгаши депутати.