Шавкат Мирзиёев иккинчи муддатга қайта сайланди. У 80,1 % овоз олди

24 октябрь, якшанба куни Ўзбекистонда президент сайловлари бўлиб ўтди. Марказий сайлов комиссияси овоз беришнинг дастлабки натижаларини якунлаб, Ўзбекистоннинг янги президенти номини эълон қилди.

Янги президент

Овоз беришнинг дастлабки маълумотларига кўра, Либерал-демократик партиядан (ЎзЛиДеП) номзод Шавкат Мирзиёев иккинчи муддатга сайланди. У кейинги 5 йил давомида мамлакатни бошқаради.

Овоз беришда иштирок этган сайловчилар умумий сонининг 80,1 %и Мирзиёевга овоз берган.

Номзодларга овоз бериш натижалари

Президентлик пойгасида Шавкат Мирзиёев ва яна 4 нафар номзод иштирок этди.

Уларнинг натижалари қуйидагича:

Иккинчи ўринни Ўзбекистон Халқ демократик партиясидан номзод Мақсуда Азизовна Ворисова 6,6 % овоз билан қўлга киритди.

Овоз бериш натижаларига кўра “Миллий тикланиш” демократик партиясидан номзод Алишер Келдиевич Қодиров учинчи ўринда. У 5,5 % овоз олди.

Нарзулло Наимович Обломуродов – Экологик партиядан 4,1 % овоз билан номзод тўртинчи ўринни эгаллади.

Баҳром Абдураҳимович Абдуҳалимов – “Адолат” социал-демократик партиясидан номзод 3,4 % овоз олди.

Сайловнинг умумий кўрсаткичлари

Республикада жами 9925 та сайлов участкаси ташкил этилган бўлса, хорижда яна 54 та сайлов участкаси ва 380 та кўчма участка фаолият кўрсатди. Масалан, Россияда Ўзбекистоннинг Москвадаги элчихонаси ва Санкт-Петербург, Қозон, Владивосток, Екатеринбург, Ростов-на-Дону ва Новосибирскдаги бош консулликларида жойлашган сайлов участкаларида овоз бериш мумкин бўлди.

Ҳаммаси бўлиб, МСК 19 859 127 сайловчини рўйхатга олди. 24 октябрь куни бўлиб ўтган президент сайловларида 16 036 914 киши овоз берди, бу рўйхатга олинган сайловчиларнинг 80,8 %ини ташкил қилади. Республика бўйича овоз бериш соат 20.00 дa якунланди.

Муддатидан олдинги сайлов

Сайлов куни ўз яшаш жойида бўла олмаган сайловчилар учун муддатидан олдин овоз бериш 2021 йилнинг 14 октябрдан 2021 йилнинг 20 октябргача ўтказилди. Ўзбекистон Республикаси Президенти сайловида муддатидан олдин овоз беришда 120 524 нафар сайловчи иштирок этди.

37 мамлакат ва 149 шаҳардаги элчихона ва консулликларда ҳам сайловлар ўтказилди. Хорижда 54 та сайлов участкаси ва 380 та қўшимча сайёр сайлов участкаси очилди. Ўзбекистонликлар Австрия, Афғонистон, АҚШ, БАА, Белорусь, Бельгия, Буюк Британия, Германия, Индонезия, Исроил, Испания, Италия, Жанубий Корея, Қирғизистон, Қувайт, Латвия, Малайзия, Миср, Озарбайжон, Покистон, Польша, Россия, Саудия Арабистони, Сингапур, Таиланд, Тожикистон, Туркманистон, Туркия, Украина, Уммон, Франция, Хитой, Ҳиндистон, Швейцария, Эрон ва Япония давлатларида овоз беришди.