Россия шашкачиларининг жаҳон чемпионатидаги ғалабаси: мумкин бўлган олтитадан бешта олтин

14 сентябрь куни Москва яқинидаги “Патриот”боғида ниҳоясига етган рус шашка бўйича жаҳон чемпионатида россиялик спортчилар олтита олтин медалдан бештасини қўлга киритди. 

Жаҳон чемпионати 27 давлатдан спортчиларни жамлади ва бу йил шашка оламидаги энг йирик мусобақалардан бирига айланди. Жаҳон чемпионатида Ўзбекистон шарафини уч нафар шашкачи ҳимоя қилди: Алишер Ортиқов, Лазиз Муралиев ва Аббос Равшанов.

Москва области Жисмоний тарбия ва спорт вазири Дмитрий Абаренов ўзининг табрик сўзида шундай таъкидлади: “Спорт чегарадан ташқарида мавжуд ва спорт доимо бирлаштиради. Ҳар бирингизни кўрганимиздан хурсандмиз, биз сизни нафақат спорт мусобақалари доирасида кутамиз, юртимизга келинг, бизда жуда меҳрибон одамлар бор. Биз сизни доим кутамиз!”.

Турнир иштирокчиларга учта ўйин форматида: чақмоқ, тезкор ва классика бўйича беллашишни таклиф қилди. Жорий йилда 5 миллион 100 минг рублга (57 минг АҚШ долларига яқин) етган чемпионатнинг соврин жамғармаси мусобақанинг юксак мақомига эга экани ва ғалабанинг аҳамиятини алоҳида таъкидлади.

Россия терма жамоаси бош мураббийи Алексей Шонин жамоанинг ўйинини ёрқин деб атади. Унинг сўзларига кўра, ушбу натижа турнирнинг юқори ташкилий фазилатлари ва хорижлик спортчиларнинг жиддий рақобати туфайли эришилди.

Ғолиблар орасида:

• Роман Шукин ва Сандаара Апросимова чақмоқ ўйинида жаҳон чемпиони бўлди.
• Тезкор ўйинда Игорь Михальченко (Беларусь) ва Анастасия Архангельская (Россия) ғалаба қозонди.
• Классик ўйинда Николай Стручков ва Тунаара Федорова олтин медални қўлга киритди.

Эътиборлиси, олти нафар жаҳон чемпионидан тўрт нафари илк олтин медалларини қўлга киритди.

Эслатиб ўтамиз, жорий йилнинг баҳорида Тошкентда шашка бўйича 64-жаҳон кубоги бўлиб ўтган ди, унда россиялик спортчилар ҳам ёрқин натижаларни кўрсатди. Дунёнинг энг кучли шашкачилари билан кечган шиддатли курашда Артем Тихонов иккита, Андрей Валюк эса битта олтин медални қўлга киритди. Тунаара Федорова рақибларига бирорта ҳам имконият қолдирмай, мутлақ чемпион бўлди.