Жаҳонга машҳур футболчи Криштиану Роналду Ўзбекистон халқига салом йўллади

Тармоқларда Криштиану Роналду Ўзбекистон халқига ўз саломини йўллаган видео тарқалди. У “Ан-Наср” даги янги жамоадоши, ҳамюртимиз Жалолиддин Машарипов билан бирга ўзбекистонликларни қутлади.

https://t.me/plovpressuz/1280

Расман Роналдунинг Саудия Арабистонидаги янги клубига ўтгани ортда қолган йилнинг охирида маълум бўлганди. Буни нашр қуйидаги сўзлар билан таъкидлаган: “Дунёдаги энг буюк спортчи. У шартномани расман имзолади”. Суратда Роналду исми ва 7 рақами ёзилган янги футболка билан акс эттирилган.

Шуни қўшимча қилиш керак, португалиялик спортчи 7-рақамни олишдан олдин, бу рақамдаайнан Жалолиддин Машарипов ўйнаган. Ўшанда интернетда ўзбекистонлик футболчи рақамни бермоқчи эмаслиги ҳақида миш-мишлар тарқалганди, бироқ унинг ўзи буни рад этди.

“Ҳа, Криштиану учун 7-рақамдан воз кечдим. Унга ўхшаган футболчи етти рақамини олса, хурсанд бўлардим. Клубда ҳамма Роналдунинг трансферини кутмоқда. Ўйлайманки, ҳаммаси яқин орада ҳал бўлади”, – деганди Машарипов Роналдунинг расмий трансфери олдидан.

2021 йилдан буён “Ан-Наср”да тўп сураётган Жалолиддин ҳозирда 77-рақамли либосда.“Пахтакор”да кўп мавсум ўтказгандан сўнг Саудия Арабистонига жўнаб кетди, БААга ижарада ўйнади, кейин эса “Ан-Наср”да тўп сурди. Машарипов 1993 йилда Урганч шаҳрида туғилган. Фаолияти давомида у “Пахтакор” ва Тошкентнинг “Локомотив” клубларида ва албатта, миллий терма жамоада ўйнаган. Жалолиддин 2020 йилда Ўзбекистонда йилнинг энг яхши футболчиси деб топилганди.

“Ал-Наср” гарчи мамлакатнинг энг совриндорклуби бўлмаса-да, Саудия Арабистонининг гигантларидан бири. У 9 ​​марта чемпионликни қўлга киритган, аммо асосий рақиби “Ал-Ҳилол”да 18 та соврин бор. “Ан-Наср” XXI асрда 3 та чемпионликни қўлга киритган бўлса, охиргиси 2019 йилда бўлган.

Жамоада Машарипов ва Роналду, “Арсенал” ва “Наполи”нинг собиқ дарвозабони Давид Оспина, “Бавария”нинг собиқ ярим ҳимоячиси Луис Густаво, испаниялик ҳимоячи Альваро Гонсалес (“Вильяреал” ва “Марсель”), бразилиялик Талиска (“Бенфика” ва “Бешиктош”), камерунлик ҳужумчи Венсан Абубакар каби футболчилар тўп суради. 

Жамоадаги энг ёрқин юлдуз Роналду бўлади –МФФИИС бўйича футбол тарихидаги энг яхши тўпурар ва RSSSF бўйича эса тўртинчи, терма жамоалар ва Испаниянинг “Реал Мадрид” клуби даражасидаги энг сермаҳсул ўйинчи. У барча даврларнинг энг яхши футболчиларидан бири ҳисобланади ва Португалия футбол федерацияси томонидан Португалия футболи тарихидаги энг яхши футболчи сифатида тан олинган. Бундан ташқари, Роналду тарихда Англия премьер-лигаси, Испания примераси ва Италия А Сериясида ғолиб чиққан биринчи футболчидир.