Самарқандда МДҲ давлатлари кутубхоначилари йиғилишади

15 май куни Самарқанд шаҳрида МДҲ давлатлари кутубхоначилари форуми бўлиб ўтади. Бу Мустақил Давлатлар Ҳамдўстлигининг “Маданий пойтахт” лойиҳаси доирасида амалга оширилаётган тадбирлардан бири бўлади.

IV Республика “Китобхонлик ҳафталиги”нинг очилиш маросимида иштирок этган Самарқанд вилояти ҳокими ўринбосари Рустам Қобилов бўлажак форум ҳақида гапирди. Ушбу тадбир доирасида китоблар тақдимоти, муаллифлар билан учрашувлар, “Менинг севимли китобларим” кўргазмаси, кутубхона бўйлаб саёҳат ва “Севимли кутубхонамга китоб совға қиламан” акцияси ўтказилади.

Тадбирда вилоятнинг кутубхона соҳасида эришилган ютуқлари ҳақида сўз юритилди. Масалан, шаҳарда кутубхоналар қуриляпти ва таъмирланяпти. Вилоят ахборот-кутубхона маркази реконструкциядан сўнг 500 нафардан ортиқ ўриндиқни сиғдира олади. Унда янги жиҳозлар, юқори тезликдаги интернет, илмий ва конференция заллари, музей кўргазмаси ва ташриф буюрувчилар учун бошқа фойдали бўлимлар мавжуд.

Бундан ташқари, вилоятда ёшлар ўртасида китобхонликни оммалаштириш ишлари олиб борилмоқда. Шу тариқа, Самарқанд вилоятидаги 8-синф ўқувчиси Наргиза Муҳаммадиева “Ёш китобхон” кўрик-танловининг республика босқичида ғолибликни қўлга киритиб, Президент совғасига сазовор бўлди.

Эслатиб ўтамиз, 4 апрель куни бўлиб ўтган тантанали маросимда Самарқанд расман “МДҲ маданият пойтахти” бўлди. Бу шуни англатадики, йил давомида ушбу шаҳар маданиятга бағишланган муҳим Ҳамдўстлик тадбирларига мезбонлик қилади. Бундан ташқари, Самарқандга МДҲнинг турли давлатларидан ижодий жамоалар келади. “Маданий пойтахт” лойиҳаси умумий маданий макон ва МДҲ мамлакатлари маданиятлари ўртасидаги мулоқот ғоясини илгари суришга қаратилган, бу ҳақда Россия президентининг махсус вакили Михаил Швидкой PLOV.PRESS нашрига берган интервьюсида гапирганди.