Ҳаммага Каниза номи билан таниш бўлган Шаҳризода Фарҳодовна ҳам бошқа юлдузлар каби ижтимоий тармоқларда нафақат мухлислар ҳайрати, балки нафрат ва қўполлигига ҳам дуч келмоқда. Хонанда уларнинг устидан бир неча бор шикоят қилган, аммо энди у ёмон изоҳ қолдирганлар билан курашиш ниятида.

Канизани кўпинча, деярли ҳар қандай янги сурати ёки тасвир – рақс, ташқи кўриниш, хатти-ҳаракатлари учун ҳақорат қилишади. Икки йил олдин, бундай ҳолатларга истеҳзо билан қарар ва ҳатто ёмон изоҳ ёзадиганларга рақслар бағишларди, аммо энди унинг сабр-тоқати тугаган кўринади.

Каниза ҳақоратли изоҳ қолдирувчиларга энди қонун орқали иш кўришга ваъда берди. Шу билан бирга, ўзига нисбатан салбий фикр билдирган одамларнинг суратларини ҳам чоп этади.

“Агар мени ҳеч қандай сабабсиз ҳақорат қилишни маъқул кўрган экансиз, ҳаракатларингиз учун жавоб беришга тайёр бўлинг. Аноним хабарларни жиддий қабул қилмайман ва бундай аккаунт эгаларини одам деб ҳисобламайман”, – дея қўшимча қилди Каниза.

Ўтмишда Каниза ҳақоратли изоҳ ёзадиганларнингDirect орқали келган хабарларини фош қилишга уриниб кўрган. Юлдузнинг сўзларига кўра, кўпчилик шундай фикр қолдириб, кейин маъмурига хат ёзиб, юлдуз билан пул эвазига учрашишни сўрашади.

Каниза 1985 йилда Фарғона вилоятида туғилган. Каниза ижодий фаолиятини 2006 йилда солист сифатида бошлаган. Хонанданинг “Ёр-ёр” деб номланган илк яккахон концерти 2016 йилда бўлиб ўтган. Каниза “Ажойиб узук” ва “Адашган дунё” фильмларида суратга тушган. Эслатиб ўтамиз, ўтган йилнинг ноябрь ойида Каниза мухлисларига қизи туғилгани ҳақида айтган эди.